Beint á efnisyfirlit síðunnar

Fréttalisti

22.11.2013

Íslandsmeistaramótið í 25m laug hafið - 3 Íslandsmet

Íslandsmeistaramótið í 25m laug í sundi hófst í dag í Ásvallalaug í Hafnarfirði. Undanrásir voru keyrðar í morgun en úrslitahluta dagsins er nýlokið. Þrjú Íslandsmet féllu en Eygló Ósk Gústafsdóttir bætti eigið met í 200m baksundi þegar hún synti til sigurs á tímanum 2.06,59. Gamla metið hennar var 2.07,10 frá því í desember 2012. Eygló var þó ekki hætt og setti einnig Íslandsmet í 200m fjórsundi er hún synti á tímanum 2.13,41 og bætti gamla metið sitt frá því í október 2012 um tæpar tvær sekúndur, 2.15,10. Í lok hlutans bætti svo boðsundssveit Fjölnis 13 ára gamalt met í 4x200m skriðsundi karla. Þeir syntu á tímanum 7.34,50 en gamla metið átti sveit SH, 7.35,34. Sveit Fjölnis skipuðu þeir: Jón Margeir Sverrisson, Kristinn Þórarinsson, Hilmar Smári Jónsson og Daníel Hannes Pálsson. Jón Margeir Sverrisson fær eftirtalinn árangur viðurkenndan: Íslandsmet S14 flokkur fatlaðra Undanrásir 400m skriðsund: 4.06,22 Undanrásir 200m flugsund: 2.17,61 Úrslit 400m skriðsund: 2:04,89 Úrslit 4x200m skriðsund (fyrsti sprettur) 200m skriðsund: 1:56,58 Þess má geta að á þessu móti eru síðustu forvöð til að ná lágmörkum á NMU og EM25 í næsta mánuði. Þeir sem hafa náð lágmörkum verða tilkynntir í lok móts. Góður dagur í lauginni á enda og við vonumst eftir öðru næstu daga.
Nánar ...
20.11.2013

ÍM 25 2013 í Ásvallalaug

Íslandsmeistaramótið í 25m laug verður haldið í Ásvallalaug í Hafnarfirði dagana 22.-24. nóvember. Allar skráningar hafa nú verið staðfestar og má nálgast keppendalista, sem og aðrar upplýsingar um mótið, á ÍM25 síðunni okkar. Mótið er sem fyrr segir haldið í Ásvallalauginni og sér SH um framkvæmd þess í samstarfi við SSÍ. Nú er mikilvægt að allir sem að mótinu koma hjálpist að við að gera mótið sem skemmtilegast. Til þess að mótið geti gengið smurt fyrir sig þörfnumst við enn fleirri starfsmanna og biðlum við því til allra félaga að hvetja
Nánar ...
19.11.2013

ÁFRAM ÍSLAND

Íslenska karlalandsliðið í knattspyrnu spilar í kvöld einhvern mest spennandi og mikilvægasta leik sem liðið hefur spilað þegar liðið mætir Króatíu. Ávinningurinn af sigri er óumdeildur, sæti á HM í Brasilíu. Svona árangur næst ekki á einni nóttu. Svona árangur næst þegar allir leggjast á eitt, leikmennirnir, þjálfarateymið, stjórn og starfsfólk KSÍ, félögin og síðast en ekki síst stuðningsfólkið, við hin öll sem ætlum að setjast niður og horfa á leikinn, hugsa hlýlega til strákanna úti í Zagreb og upplifa hvernig liðsheildin skilar okkur áfram. En þó leikurinn vinnist ekki og liðið komist ekki áfram, hefur íslenska knattspyrnulandsliðið sýnt okkur öllum, hvar sem við stöndum í íþróttastarfinu, að það er allt hægt. Það er mikill ávinningur fólginn í því, fyrir okkur öll, þegar vel tekst til í hreyfingunni og KSÍ hefur með sínu fólki og sínum félögum haldið vel utan um uppbyggingu yngri flokka, eðlilega endurnýjun og ekki síst tókst einstaklega vel til þegar núverandi landsliðsþjálfari var ráðinn. Hann hefur leyst úr læðingi mikinn kraft, náð að samhæfa fólk úr ýmsum áttum, haldið hópnum á tánum og blásið þeim í brjóst eftirvæntingu, von og trú á starfinu. Við sem komum úr öðrum íþróttagreinum getum horft til þessa og lært. Hvetjum okkar lið áfram, fögnum með því hvernig sem úrslitin verða í kvöld. Árangurinn er óumdeildur. Áfram Ísland.
Nánar ...
01.10.2013

Sjósundgarpur 2013 - útgerðarkeppni SSÍ

Um síðustu helgi fór fram keppni milli útgerðarfélaga í sjósundi. SSÍ stóð fyrir keppninni ásamt Landhelgisgæslunni og ÍTR. Keppnin var haldin í frábærri aðstöðu ÍTR í Nauthólsvík og tókst mjög vel með dyggri aðstoð SJÓR, Sjósund- og sjóbaðsfélags Reykjavíkur. Í upphafi syntu 40 félagar úr SJÓR 260 metra þar sem þeir kepptu um hver væri með frumlegasta höfuðfatið. Í framhaldi af því kepptu 10 fulltrúar útgerðarfélaganna um titilinn Sjósundgarpur Íslands 2013. Þar varð hlutskarpastur Árni Guðnason en hann var fulltrúi Hvals í keppninni. Í öðru sæti varð Davíð Davíðsson fulltrúi HB Granda. SSÍ þakkar þátttakendum kærlega fyrir góða skemmtun og Landhelgisgæslunni og ÍTR/Reykjavíkurborg fyrir frábært samstarf. Við sjáumst að ári í Nauthólsvíkinni.
Nánar ...
01.10.2013

Uppfært Atburðadagatal

Nú hefur uppfært Atburðadagatal verið sett á síðuna. Eins og sjá má hafa orðið breytingar á útliti sem vonandi eru til þæginda, en efnislega er þetta sama dagatalið og við gáfum út staðfest af stjórn SSÍ í byrjun sundárs. Inn á dagatalið er búið að setja öll Alþjóðleg mót sem við ætlum okkur að taka þátt í, Íslands-, Bikar- og Aldursflokkamót, opin sundmót félaga og einhver önnur mót félaga sem hefur verið óskað eftir að færu inn á dagatalið. Einnig hafa verið settir inn fundir stjórnar, alþjóðasamstarf SSÍ og svo norðurlandamót í öðrum sundíþróttum en sundi. Það er gert til að brýna okkur til að sinna hlutverki okkar sem samband allra sundíþrótta. Við munum reyna að viðhalda dagatalinu eins og hægt er jafnóðum. Inn á það vantar ennþá endanlega dagsetningu á FÆR vs ÍSL og endanlega dagsetningu og staðsetningu á Sundmóti smáþjóða Evrópu.
Nánar ...
30.09.2013

Færeyjar vs Ísland frestað

Sundsamband Íslands og Sundsamband Færeyja urðu ásátt í dag um að fresta sundkeppninni Færeyjar vs Ísland sem átti að fara fram laugardaginn 5. október 2013, fram á vorið 2014. Þetta er gert að beiðni SSÍ, Keppnin verður þess í stað annaðhvort síðustu helgina í apríl eða fyrstu helgina í maí 2014. Við þökkum þeim sem hafa lagt hönd á plóg við að undirbúa keppnina. Við munum mæta sterk til leiks í vor til Færeyja.
Nánar ...
28.09.2013

Munið Nauthólsvík í dag kl. 13:00

Í dag fer fram keppni útgerðarfélaga um titilinn sjósundkappi Íslands 2013. Keppnin fer fram í Nauthólsvík kl. 14:00 en á undan synda félagar í SJÓR. Í lokin verður svo menntamálaráðherra veiddur upp úr sjónum upp í þyrlu Landhelgisgæslunnar. Það eru Sundsamband Íslands, Landhelgisgæslan og ÍTR sem standa fyrir viðburðinum.
Nánar ...
28.09.2013

Paolo Frischnecht nýr framkvæmdastjóri LEN

Portúgalinn Paolo Frischnecht hefur verið ráðinn framkvæmdastjóri LEN. Þetta var tilkynnt á ársþingi LEN nú rétt í þessu. Hann tekur við af Laszlo Szakadati i sem lét af störfum fyrr á þessu ári. Paolo var formaður portúgalska sundíþróttasambandsins í nokkur ár og hefur setið í stjórn LEN og FINA undanfarin kjörtímabil. Hann er fyrrum sundmaður og þekkir vel til í sundheiminum. SSÍ væntir mikils af samstarfi við Paolo, en við höfum fundið fyrir því hversu mikilvægt er fyrir SSÍ að vera í góðu sambandi við LEN.
Nánar ...
27.09.2013

Eistland orðinn fullgildur meðlimur í NSF

Eistland varð áðan fullgildur meðlimur í NSF, Norræna sundsambandinu. Þetta var samþykkt á aukaþingi NSF í Edinborg í dag. Fram til þessa hefur Eistland verið aukameðlimur í sambandinu, en kemur nú inn með fulla ábyrgð og skyldur. Þá eru NSF löndin orðin 7.
Nánar ...
26.09.2013

Sjósundgarpur ársins 2013 - útgerðirnar keppa á laugardaginn

Sjósundkeppni fer fram í Nauthólsvík laugardaginn 28.9.2013 klukkan eitt. Þar keppa útgerðarfyrirtækin um titilinn „Sjósundgarpur Íslands 2013“. Keppnin er samstarfsverkefni Sundsambands Íslands, Landhelgisgæslunnar og ÍTR. Keppnin fer þannig fram að keppendur (fulltrúar útgerðarfyrirtækja) stinga sér til sund frá varðskipinu Baldri, sem siglt verður inn í Nauthólsvíkina, og synda í land en endamarkið er á sandströndinni í Nauthólsvík við pottinn. Vegalengdin sem synd er 100 metrar. Dagskrá: Kl. 13.00 synda meðlimir Sjór (Sjósund- og sjóbaðsfélag Reykjavíkur), sem er aðildarfélag að Sundsambandi Íslands, 260 metra vegalengd. Veitt verða verðlaun fyrir skrautlegasta höfuðfatið. Kl. 14.00 hefst keppni milli útgerðarfélaga þar sem synt verður frá varðskipinu Baldri í land. Sigurvegari er „Sjósundgarpur Íslands 2013“. Starfsmenn Landhelgisgæslunnar fylgja sundmönnum eftir á gúmmíbátum og er kafari tilbúinn til taks. Kl. 15.00 verður Menntamálaráðherra hent í sjóinn og sýnir áhöfn þyrlunnar nýstárlega björgun þar sem viðkomandi er veiddur upp úr sjónum með þar til gerðu neti. Markmiðið er að vekja athygli á fjölbreyttu starfi Sundsambands Íslands, öryggi sjómanna og mikilvægi þess að kunna að synda. En afhverju stendur SSÍ fyrir sjósundkeppni útgerða á laugardaginn? Það er mikilvægt að kynna sund og minna á hversu mikilvægt það er fyrir Íslendinga að kunna að synda og bjarga sér. Að auki SSÍ er að vinna að því að koma upp Lífbjörgunardeild innan sambandsins að Evrópskri fyrirmynd og við erum að gera okkur gildandi í norrænu samstarfi um Lífbjörg og verðum vonandi meðlimir í Evrópusamtökunum um Lífbjörg fyrir árslok. Landhelgisgæslan er að kynna nýjungar í björgun úr sjó og ÍTR er að vekja athygli á frábærri aðstöðu sem rekin er í Nauthólsvík. Framundan hjá SSÍ er árleg keppni milli Íslands og Færeyja fer fram í Færeyjum laugardaginn 5. október og sömu helgi heldur SSÍ í samvinnu við Sf Ægi Norðurlandameistaramót garpa, í Laugardalslaug. Undirbúningur fyrir Íslandsmeistaramót, Evrópumeistaramót og Norðurlandameistaramót í stuttu brautinni (25m) í nóvember og desember er á fullu og auðvitað erum við alltaf að búa okkur undir stóru mótin, EM, HM, Smáþjóðaleika og Ólympíuleika. Í maí tekur Ísland við forsæti í Norræna sundsambandinu (Ísland, Færeyjar, Noregur, Svíþjóð, Finnland og Danmörk) og við höfum í samstarfi við norrænu vini okkar mannað tvær nefndir LEN Evrópska sundsambandsins, sundtækninefndina og garpanefndina. SSÍ er í stöðugri þróun og undir sambandið heyra eftirtaldar íþróttagreinar: Keppnissund, garpasund, sundknattleikur, víðavatnssund, dýfingar og samhæfð sundfimi þannig að verkefnin eru ærin. Að auki höfum við í samstarfi við HÍ látið útbúa námsefni fyrir þjálfara sem hægt er að sækja á netið. Það þýðir að þjálfari sem ætlar að sækja sér réttindi getur tekið bóklega hluta ÍSÍ og SSÍ á netinu og kemu einungis 2 helgar í verklega kennslu í stað 12 áður.
Nánar ...
22.09.2013

Í upphafi sundárs - Leiðrétt gögn komin á netið

Undanfarnar vikur hefur stjórn og starfsfólk SSÍ unnið að því að setja saman þau gögn sem máli skipta fyrir nýbyrjað sundár. Við höfum kallað eftir athugasemdum og aðstoð úr hreyfingunni og hittum þjálfara, formenn og foreldra/forráðamenn landsliðsfólks á fundum. Þessi samskipti hafa verið gefandi og leitt margt ágætt af sér. Landsliðsnefnd og Dómara-, móta- og tækninefnd hafa haldið fundi og stjórn SSÍ hefur komið saman í tvígang á þessu hausti til að ræða þessi mál, annars vegar 14. ágúst og hins vegar 18. september. Til að sjá gögnin sem eru þegar komin inn er hægt að smella á hlekkina og þá verðið þið leidd að beint að þeim. Ýmsar ákvarðanir hafa verið teknar og breytingar hafa verið samþykktar undanfarnar vikur. Þar er fyrst til að taka breytingar á stjórn SSÍ. Karen Malmquist stjórnarmaður hefur tekið sér leyfi frá stjórnarstörfum ótímabundið vegna persónulegra mála. Jón Oddur Sigurðsson hefur sagt sig frá störfum í stjórn SSÍ vegna anna. Þau munu bæði tengjast sundhreyfingunni áfram og sinna einstökum verkefnum, eftir því sem verkast. Í stað þeirra koma inn í stjórn varamennirnir, Ingibjörg Kristinsdóttir og Jónas Tryggvason. Unnið hefur verið að atburðadagatali SSÍ. Það er nánast tilbúið og verður gefið út í endanlegri mynd eftir ársþing Evrópska sundsambandsins, LEN nú í lok mánaðar. Lágmörk fyrir SSÍ mótin eru tilbúin og birt á heimasíðu SSÍ og lágmörk og viðmið fyrir landsliðsverkefni eru einnig tilbúin að mestu og birt á heimasíðunni. Þá var reglugerðum fyrir ÍM25, ÍM50, UMÍ og AMÍ breytt lítillega til að koma til móts við mjög ákveðnar ábendingar úr hreyfingunni. Stjórn SSÍ hefur staðsett öll sundmót sambandsins, ennþá á eftir að fastnegla staðsetningu á Íslandsmóti og Bikarkeppni í Sundknattleik og það hefur ekki verið sett dagsetning á Íslandsmót í víðavatnssundi og dýfingum. Víðavatnssundið fer fram í Nauthólsvík og dýfingarnar í Sundhöll Reykjavíkur. Að öðru leyti verða mót SSÍ staðsett sem hér segir: ÍM25 verður í Ásvallalaug, framkvæmdaaðili SH. Bikarkeppni SSÍ verður í Laugardalslaug, framkvæmdaaðili SSÍ. ÍM50 verður í Laugardalslaug, framkvæmdaaðili SSÍ. 3 og 5 km mót verður í Laugardalslaug, framkvæmdaaðili SSÍ. IMOC verður í Ásvallalaug, framkvæmdaaðili SH. AMÍ verður í Vatnaveröld Reykjanesbæ, framkvæmdaaðili ÍRB. UMÍ verður í Ásvallalaug, framkvæmdaaðili SH. Hy-tec skrár fyrir öll mót SSÍ munu berast félögunum á næstu dögum. Í lok ÍM25 verður að venju uppskeruhátíð SSÍ fyrir síðasta sundár, en ekki hefur verið gengið frá því hvar það verður, né hver kostnaður við það verður. Stjórn SSÍ hefur áhuga á að í lok UMÍ verði einhverskonar sumarhátíð þar sem margir sundmenn eru þá á leið í leyfi frá sundiðkun. Hugmyndin hefur ekki verið útfærð, en allar ábendingar verða vel þegnar. Gerðar hafa verið breytingar á II. kafla reglugerða SSÍ, Almennum ákvæðum, en þar var fyrst og fremst verið að færa textann til þess sem gert er í raunveruleikanum auk þess sem nokkrar ambögur voru lagfærðar. III. kafla reglugerða SSÍ, Hlutverk SSÍ og starfsnefnda var einnig breytt lítillega, þar var bætt við einni starfsnefnd SSÍ, þjálfaranefnd, sem ætlað er að vera rödd starfandi þjálfara gagnvart SSÍ en einnig styðjandi við það starf sem fram fer á landsvísu í uppbyggingu sundíþróttarinnar. Þessari nefnd er að auki ætlað að vera farvegur samtals milli starfandi þjálfara á hverjum tíma og stjórnar SSÍ. Hulda Bjarkar þjálfari hjá Breiðablik hefur verið mjög ötull talsmaður sjónarmiða þjálfara á undanförnum mánuðum og á hún góðar þakkir skyldar fyrir það starf. Ég hvet starfandi þjálfara til að tilnefna þrjá úr sínum hópi í þessa nefnd. Best væri að tilnefningarnar bærust stjórn SSÍ fyrir stjórnarfund sambandsins 18. október. Skipaður hefur verið hópur til að vinna að betri útfærslu á Íslandsmóti félagsliða. Þeir sem hafa verið beiðnir um að taka sæti í hópnum eru: Ingibjörg Kristinsdóttir úr stjórn SSÍ, Jón Hjaltason formaður KR, Heiðar Ólason formaður Óðins og Pétur G. Markan framkvæmdastjóri HSV. Hópnum er ætlað að skila niðurstöðu fyrir 1. nóvember. Stjórn SSÍ hefur samþykkt lágmörk og viðmið í landsliðsverkefni að tillögu Landsliðsnefndar og landsliðsþjálfara. Sum lágmörkin eru heldur stífari en kynnt var á þjálfarafundi og formannafundi, þar sem mjög ákveðnar ábendingar komu fram frá þjálfurum um að þeim þætti fyrri tillagan of metnaðarlítil. Þá var samþykkt tillaga um að sundfólk sem nær lágmörkum inn á alþjóðleg mót, má synda aðrar greinar á viðkomandi móti að því tilskyldu að tími sem sundfólkið á í þeim greinum sé ekki meira en 1,50% lakari en lágmarkstími greinarinnar og reglur viðkomandi móts leyfi það. Þjálfarar viðkomandi sundfólks þurfa að senda óskir til SSÍ varðandi slíkar aukagreinar þegar lágmarkatímabili lýkur. Einnig var samþykkt tillaga um að einungis væri hægt að ná lágmörkum í alþjóðleg verkefni (landsliðsverkefni) á sundmótum sem eru á atburðardagatali SSÍ í upphafi sundtímabils (staðfest af landsliðsnefnd) og á mótadagatali LEN og FINA. Landsliðsnefnd gefur út lista yfir mót sem gilda um leið og endanlegt atburðadagatal verður gefið út 1. október 2013. Landsliðsnefnd og landsliðsþjálfari lögðu einnig fram tillögu um uppbyggingu landsliða sem stjórn hefur samþykkt. Tillagan hljóðar svo: „Landslið skiptast í Afrekslandslið Landslið Unglingalandslið Framtíðarhóp Landsliðsnefnd setur viðmið fyrir hvern hóp fyrir sig Einn úr stjórn eða landsliðsnefnd verður ábyrgur fyrir hverjum hópi Landsliðsþjálfari velur þjálfara til að styðja við og sjá um hvern hóp. Sá þjálfari vinnur náið með landsliðsþjálfara Haldnir verða æfingadagar fyrir alla hópa – sameiginlega eða sér.“ Það er von okkar í stjórn SSÍ að þessi uppbygging fari fram á sem breiðustum grunni og allir þjálfarar verði viljugir að taka þátt í slíkri uppbyggingu. Stjórn SSÍ og starfsfólk hafa líka gengið í að uppfæra metaskrár. Þær verða birtar hér innan nokkurra daga. Af fenginni reynslu er ekki ólíklegt að einhver met hafi fallið milli stafs og hurðar. Því biðjum við ykkur að fara yfir metaskrárnar og benda okkur á ef þið sjáið villur, þannig að hægt sé að lagfæra þær fljótt og vel. Stjórn SSÍ hefur ákveðið að kaupa mótaforritið Splash. Um leið er félögum og deildum boðið að ganga inn í tilboð sem SSÍ hefur fengið frá rétthöfum bæði um móta- og þjálfarahluta forritsins. Helstu kostir Splash umfram önnur mótaforrit er að það getur lesið gögn úr öðrum forritum, það er beintengt gagnagrunni og auðveldar utanumhald upplýsinga og auðvelt er að ná upplýsingum fram á ýmsu formi með því. Þau félög og deildir sem hafa áhuga á að ganga inn í þessi viðskipti eru beðin um að vera í sambandi við Ingibjörgu framkvæmdastjóra fyrir 15. október. Varðandi fjáröflun, þá eru að hefjast nokkur verkefni sem munu taka á sig mynd á næstunni. Við vonum að þau skili okkur fjármunum til að auðvelda okkur starfið. Ef þið hafið áhuga á að taka þátt í verkefnum með okkur megið þið gjarnan vera í samband við formann SSÍ. Smáþjóðaleikarnir 2015 verða haldnir á Íslandi. Sundið er okkar stærsta íþrótt á leikunum og mikilvægt að við í sundhreyfingunni stöndum okkur vel í undirbúningnum. Við höfum þegar skipað í stöðu greinastjóra og umsjón dómgæslu og mannvirkja, en okkur vantar fólk til að taka að sér umsjón með undirbúningi á ýmsum sviðum. Áætlað er að halda fyrsta „testmótið“ á ÍM50 2014, ráðgert er að RIG 2014 og ÍM50 2015 verði einnig notuð til að stilla okkur af. Fram að því þurfum við að halda vel á spöðunum. Á undanförnum árum hafa formaður SSÍ og ritari SSÍ átt fundi með stjórnum félaga. Þessir fundir hafa gefist ágætlega og við höfum getað glöggvað okkur á þeim málum sem brenna á stjórnum félaga og stundum höfum við getað lagt eitthvað af mörkum í þessum samtölum eða í framhaldi af þeim. Það er ósk okkar hjá SSÍ að þessi samskipti haldi áfram í vetur. Hafið endilega samband á formaður@sundsamband.is . Heimasíða SSÍ var endurnýjuð síðastliðinn vetur og við höfum farið okkur gætilega í að þróa hana áfram. Við viljum að síðan verði góð upplýsingasíða en ekki síður fréttasíða þar sem við söfnum saman sögunni okkar. Ritstjórn síðunnar er í upphafi á höndum formanns, framkvæmdastjóra og mótastjóra, en ætlunin er að þeir sem fara sem fylgdarfólk í verkefnum geti einnig sett inn efni/fréttir á virkan hátt. Fundargerðir núverandi stjórnar SSÍ eru nú allar aðgengilegar á síðunni ásamt þinggerð Sundþings 2013 er komin á síðuna ásamt þinggerð 2011. Allar ábendingar um það sem betur má fara á síðunni eru vel þegnar á netfangið formadur@sundsamband.is .
Nánar ...

 

 

Fréttasafn eftir mánuðum

Á döfinni

24