Beint á efnisyfirlit síðunnar

66. þing Sundsambands Íslands

01.04.2025

66. þing Sundsambands Íslands fór fram laugardaginn 29. mars.

Þingið fór vel fram undir forystu þeirra Guðmundar Óskarssonar frá Golfklúbbi Keilis og Guðmundu Ólafsdóttur framkvæmdastjóra ÍA. Þátttaka var góð en 40 fulltrúar frá 12 félögum sóttu þingið að þessu sinni. Góðar og miklar umræður fóru fram um tillögur sem lágu fyrir á þinginu en hápunktur þingsins var veiting Heiðursviðurkenninga.

Formaður SSÍ Björn Sigurðsson var endurkjörinn sem formaður til tveggja ára. Viktoría Gísladóttir gaf ekki kost á sér til áframhaldandi setu í stjórn SSÍ og var henni innilega þakkað fyrir gott og óeigingjarnt starf á undanförnum árum. Hún mun áfram starfa í Dómaranefnd SSÍ. Nýr stjórnarmaður er Magnús Tryggvason en hann hefur verið viðloðandi hreyfinguna í tugi ára og bjóðum við Magnús velkominn til starfa.

Stjórn SSÍ er skipuð eftirfarandi aðilum:


Formaður Björn Sigurðsson

Árni Sigurðsson

Bjarney Guðbjörnsdóttir

Guðrún Pálsdóttir

Guðrún Rósa Þórsteinsdóttir

Hörður J Oddfríðarson

Júlía Þorvaldsdóttir

Leifur Guðni Grétarsson

Magnús Tryggvason


Á þinginu voru 24 einstaklingar sæmdir silfurmerki SSÍ og 11 sæmdir gullmerki SSÍ.

Sundkappinn, Anton Sveinn McKee var heiðraður en hann ákvað að setja sundskýluna á snúruna í haust.

Valkyrjurnar sem syntu yfir Ermasundið 28. september 2024 voru sæmdar silfurmerki SSÍ. Sveitina skipuðu þær María Fanndal Birkisdóttir, Iðunn Ása Óladóttir, Ásta Þóra Ólafsdóttir og Ísey Grétar Þorgrímsdóttir.

Nafnbótina sjálfboðaliðar ársins hlutu þær Guðrún Pálsdóttir frá ÍRB og Pálmey Magnúsdóttir SH.

Þrír einstaklingar voru gerðir að heiðursfélögum SSÍ en það eru þau Eðvarð Þór Eðvarðsson, Guðmundur Gíslason og Hrafnhildur Guðmundsdóttir.

Eðvarð Þór Eðvarðsson hefur sett mark sitt á sundíþróttina um árabil. Fyrst sem sundmaður en hann byrjaði að æfa sund hjá Njarðvík 8 ára gamall, seinna sem afreksmaður í sundi og síðast en ekki síst sem farsæll þjálfari. Hann hefur verið merkisberi sundíþróttarinnar í Njarðvík og á Íslandi í tæplega 50 ár. Eðvarð Þór státar af einum besta sundferli sem íslenskur sundmaður hefur átt og náð frábærum árangri hér heima og á alþjóðlegum vettvangi. Árið 1986 var hann kjörinn íþróttamaður ársins. Það ár var hann fyrstur íslenskra sundmanna til að komast í úrslit á heimsmeistaramóti í sundi. Hann setti jafnframt Norðurlandamet á mótinu. Árið 1988 komst hann í 16. manna úrslit á Ólympíuleikum. Þá hefur Eðvarð Þór sett fjölda Íslandsmeta á ferlinum. Hápunktur á hans ferli var þegar hann varð í fjórða sæti í 200m baksundi á EM50 1987, þar setti hann einnig íslands- og norðurlandamet í greininni. Þegar keppnisferlinum lauk átti UMFN og sundíþróttin í heild sinni því láni að fagna fá 66. þing Sundsambands Íslands Haldið í húsakynnum SÁÁ Efstaleiti 7 29. mars 2025 Þingskjal nr: 2025 – 7 Eðvarð til starfa sem þjálfara og stendur sundhreyfingin í heild í mikilli þakkarskuld við hann fyrir það. Hann hefur verið góð fyrirmynd og afar farsæll þjálfari. Með sínu góða starfi hefur hann glætt sjálfstraust og keppnisanda óteljandi ungmenna og hjálpað þeim til að verða ekki eingöngu betri sundmenn, heldur betri einstaklingar sem sýna samferðafólki sínu virðingu og sinna þeim verkefnum sem þau takast á við í lífinu með dugnaði, elju og samviskusemi.

Guðmundur Gíslason á langan og farsælan feril að baki sem einn af okkar fremstu sundmönnum. Hann var fyrstur Íslendinga að ná þeim ótrúlega árangri að keppa á fjórum Ólympíuleikum, í Róm 1960, Tókýó 1964, Mexíkó-borg1968 og í á leikunum í Vestur-Þýskalandi 1972. Hann setti yfir 150 Íslandsmet á ferlinum og náði góðum árangri á alþjóðlegum mótum. Hann var kjörinn Íþróttamaður ársins í tvígang, fyrst árið 1962 og svo aftur sjö árum síðar, 1969. Eftir að hann hætti keppni hefur hann verið hvetjandi og ötull stuðningsmaður sundhreyfingarinnar hér á landi. Hann starfaði með Sundráði Reykjavíkur og Sundsambands Íslands um árabil. Hann barðist fyrir betri aðstöðu fyrir sundíþróttina og sat í byggingarnefnd Laugardalslaugarinnar á sjöunda áratugnum.

Hafnhildur Guðmundsdóttir er brautryðjandi í Íslensku sundi og ein af fremstu sundkonum sem Ísland hefur alið. Hún keppti fyrir Íslands hönd á tveimur Ólympíuleikum – í Tókýó 1964 og Mexíkóborg 1968 – og varð þar með ein af fyrstu íslensku konunum til að keppa á þessum stærsta alþjóðlega vettvangi íþrótta. Hún var margfaldur Íslandsmeistari, fjölhæf og yfirburðar sundkona um langt árabil, ekki bara hér heima heldur líka á erlendum vettvangi. Hún var fjórum sinnum á lista yfir kjör íþróttamann ársins, 1963, 1964, 1965 og 1968. Eftir að keppnisferlinum lauk helgaði Hrafnhildur sig sundkennslu og þjálfun, lengst af í Þorlákshöfn og á Selfossi. Hún á farsælan þjálfaraferil að baki og þjálfaði hún meðal annars eigin börn sem eins og hún náðu góðum árangri í sundi.


Upplýsingar um heiðursviðurkenningar má sjá hér og nánari upplýsingar um þingið má sjá hér

Til baka